مس گرینڈ انٹرنیشنل ریچل گپتا سے تاج واپس لے لیا گیا | بھارتی حسینہ نے وعدہ خلافیوں اور زہریلے ماحول پر خاموشی توڑ دی

نئی دہلی: ہندوستان کی پہلی مس گرینڈ انٹرنیشنل ریچل گپتا سے ان کا تاج واپس لے لیا گیا ہے، جس کے بعد عالمی بیوٹی پیجینٹس کی سیاست، دباؤ اور استحصالی ماحول ایک بار پھر خبروں کی زینت بن گئے ہیں۔

مس گرینڈ انٹرنیشنل آرگنائزیشن کا مؤقف

مس گرینڈ انٹرنیشنل آرگنائزیشن نے ایک باضابطہ بیان میں کہا ہے کہ ریچل گپتا نے اپنی ذمہ داریوں کو سنجیدگی سے نہیں نبھایا، جن میں بغیر اجازت دیگر پراجیکٹس میں شرکت اور گواٹے مالا کے طے شدہ ٹرپ میں شرکت سے انکار شامل تھا۔ اسی بنیاد پر ان سے تاج واپس لے لیا گیا۔

ریچل گپتا کا جذباتی ردعمل: “میں نے خود تاج واپس کیا”

ریچل گپتا نے انسٹاگرام پر ایک جذباتی پیغام میں وضاحت کی کہ انہوں نے خود تاج واپس کیا، کیونکہ انہیں وعدہ خلافیوں، بدسلوکی اور ایک زہریلے ماحول کا سامنا تھا۔

انہوں نے کہا:

“مس گرینڈ انٹرنیشنل بننا میری زندگی کا ایک حسین خواب تھا، لیکن اس کے بعد کا وقت میرے لیے ذہنی طور پر بہت اذیت ناک رہا۔ میں مزید خاموشی اختیار نہیں کر سکتی۔”

ریچل گپتا نے یہ بھی اعلان کیا ہے کہ وہ جلد ہی ایک مکمل ویڈیو جاری کریں گی جس میں وہ اپنی پوری کہانی اور ساتھ ہونے والے ناروا سلوک کی تفصیلات بیان کریں گی۔

سی جے اوپیازا بن سکتی ہیں نئی مس گرینڈ انٹرنیشنل

میڈیا رپورٹس کے مطابق، فلپائن سے تعلق رکھنے والی پہلی رنر اپ سی جے اوپیازا کے تاج سنبھالنے کے امکانات روشن ہیں۔

مس انگلینڈ 2025 کا بھی بھارتی مقابلے پر اعتراض

یہ تنازع ایسے وقت پر سامنے آیا ہے جب حال ہی میں مس انگلینڈ 2025 میلا ماگی نے بھی مس ورلڈ انڈیا مقابلے میں اسپانسرز کے استحصالی رویے اور لباس سے متعلق دباؤ پر تنقید کی تھی۔